أكد الموسيقار الكبير هاني شنودة أنه كان أول من اكتشف موهبة الفنان عمرو دياب، مشيرًا إلى أنه راهن على صوته منذ اللحظة الأولى، وأنه لا يزال يرى فيه واجهة مشرفة للفن المصري. وجاءت تصريحات شنودة خلال مداخلة هاتفية مع برنامج “بنظرة تانية”، الذي يقدمه الإعلامي محمود الجلفي على قناة الشمس.
وقال شنودة: “أنا اللي اكتشفت عمرو دياب لوحدي، وفاكر أول لقاء جمعني بيه، كان في أحد الفنادق، وخبط على باب أوضتي، وطلب يسمعني صوته، ولما غنّى، حسّيت فورًا إن عندي موهبة حقيقية قدامي”.
وأضاف شنودة: “قلت له: عندك كل حاجة حلوة، صوتك مميز، وشكلك جذاب، لكن مشكلتك الوحيدة إنك بتتكلم بورسعيدي، ولازم تعيش في القاهرة علشان تنجح”.
وتابع: “تاني يوم رجعلي تاني مصرّ على إنه يتعلم، وبالفعل أثبت لي إنه فنان من نوع خاص. عنده عزيمة، وبيتطور بسرعة، ومواقفه من البداية كانت بتقول إنه هيبقى نجم كبير، وهو فعلاً قدر يبني لنفسه مكانة راسخة”.
وعن أول تعاون بينهما، أشار شنودة إلى أن أغنية “الزمن” كانت بداية الشراكة الفنية بينهما، قائلًا: “أنا لحّنت الأغنية، لكن أكتر حاجة عجبتني فيها كانت كلمات الدكتور زكي، لدرجة إن لحد دلوقتي لسه معجب بيها كأنها مش من ألحاني”.
وحول رأيه في مسيرة عمرو دياب الفنية، قال شنودة: “كل مرة أشوفه فيها بحفلة بلاقيه متجدد أكتر، وألبوماته كل مرة أحسن من اللي قبلها، هو مش بس نجم، هو نموذج للفنان اللي دايمًا بيتطور وبيواكب العصر، ومفيش حد ينفع يتحط جنبه”.
أما عن الألبوم الجديد للهضبة، فأوضح شنودة: “الناس كلها اتفاجئت من الألبوم، بس أنا ما تفاجئتش، لأن دايمًا متوقع منه الأفضل، هو طول عمره بيقدم الجديد، وأنا عارف إنه مش بيقف عند مرحلة واحدة، دايمًا بيتحدى نفسه وبيقدّم حاجة أقوى”.
واختتم شنودة حديثه بالإشادة بذوق عمرو دياب الفني العالي، وحرصه الدائم على التجديد وتقديم ما يليق بجمهوره الواسع، مؤكدًا أنه سيظل من أبرز وأهم رموز الغناء في مصر والوطن العربي.
???? رابط المداخلة
